RUS
SMARTNEWS.KZ басылымының хабарлауынша, Шығыс Қазақстан облысы бойынша Қаржылық мониторинг агенттігі «QazConstructions» жауапкершілігі шектеулі серіктестігінің басшылығына қатысты сотқа дейінгі тергеу жүргізіп жатыр. Тергеу мәліметінше, компания мемлекеттік қаражатты жымқырған.
Аталған қаржы Шығыс Қазақстан және Абай облыстарындағы жеті ауданға қарасты 11 әлеуметтік нысанның құрылысына бөлінген. Алайда, жоспарланған нысандардың бірқатары пайдалануға берілмеген. Күдіктілердің қатарында аталған серіктестіктің бұрынғы директорының орынбасары бар — ол Құрчұм аудандық мәслихатының депутаты болып шыққан.
«Жобалар аймақ тұрғындарының өмір сапасын арттырып, демалыс пен спортқа қолайлы жағдай жасауға бағытталған болатын. Бірақ күдіктілердің заңсыз әрекеттері салдарынан төрт спорттық-сауықтыру кешені мен жеті ауылға арналған су құбыры желілері іске қосылмаған. Бұл елді мекендерде 20 мыңнан астам адам тұрады», — делінген ресми хабарламада.
Тергеу дерегінше, ұрланған қаражат аффилиирленген компаниялар арқылы қолма-қол ақшаға айналдырылған. Бұл қаржыға Астанадағы элиталы тұрғын үй кешендерінен пәтерлер, сондай-ақ Lamborghini Urus, Cadillac Escalade, Mercedes маркалы көліктер мен асыл тұқымды жылқылар сатып алынған.
Сот санкциясымен барлық мүлікке тыйым салынды. Екі күдіктіге қатысты екі ай мерзімге қамауда ұстау түріндегі бұлтартпау шарасы қолданылды.
Қазір тергеу жалғасуда. Қылмыстық іс бойынша өзге мәліметтер Қылмыстық-процестік кодекстің 201-бабына сәйкес жариялануға жатпайды.