Астанадағы екі әйелдің өлімінен соң хирургке қатысты тергеу жүріп жатыр
Тағы бір қыз комаға түскен көрінеді.
SMARTNEWS.KZ басылымының хабарлауынша, Астанада бір хирургтің әрекетінен екі әйел зардап шеккені анықталды: біреуі пластикалық операциядан кейін көз жұмған, екіншісі жарты жылға комаға түскен. Екі жағдай да әртүрлі клиникаларда болғанымен, дәрігердің аты-жөні бір адамға тиесілі болуы мүмкін. Бұл туралы КТК арнасы жеткізді.
Соңғы оқиға жаздың басында болған. Әйел мұрынға жасалған септоринопластикадан кейін қайтыс болған. Кейін белгілі болғандай, операция жүргізілген медициналық орталықта хирургиялық араласуға рұқсат беретін лицензия болмаған. Қазір бұл клиниканың лицензиясы тоқтатылған.
Тағы бір оқиға биыл көктемде тіркелген. Сол типтегі операциядан кейін тағы бір қыз ес-түссіз қалып, комаға түскен. Ол қазір әлі де оңалту емін алып жатыр. Бұл жағдайда операция жасалған клиника әлі тексерілмеген.
Денсаулық сақтау министрлігінің Медициналық және фармацевтикалық бақылау комитетінің төраға орынбасары Нұрлан Аймановтың айтуынша, мекеме ұзақ уақыт бойы тексеруден жалтарып келген.
«Марқұм мен комадағы қыздың туыстары — бір хирург екенін айтып отыр. Бірақ біз ресми түрде тексеру бастағанға дейін бұл деректі растай алмаймыз. Медициналық ұйым тәуелсіз сараптама жүргізуден бас тартып, уақыт созып келді. Енді бұдан әрі күтуге болмайды», — деді Айманов.
Қазір комитет аталған дәрігер мен екі клиниканың әрекетін мұқият тексеруге кіріседі. Тергеу қорытындысы бойынша шешім қабылданады.
Материал авторы
