Бір жылда неке жүзіктері 36 пайызға қымбаттады

Energyprom.kz мәліметінше, бір жылдың ішінде ішкі нарықтағы неке жүзіктерінің бағасы 36% өскен.

2023 жылдың қаңтар-ақпанында зергерлік және балама бұйымдардың өндіріс көлемі ақшаға шаққанда 212 млн теңге болып, 2022 жылдың қаңтар-ақпанына қарағанда 6,3% көтерілді.

Өңірлер арасында ең үлкен көлем Алматы облысына тиесілі – 95,4 млн теңге.

Одан кейін Қарағанды обылсы (33,4 млн теңге), Астана (24,5 млн теңге), Шымкент (20,5 млн теңге) және Шығыс Қазақстан облыстары тұр.

«Ақпан айының қорытындысы бойынша зергерлік бұйымдар мен сағаттардың бағасы 33,2% өскен. Былтыр бұл кезеңде баға өсімі 6,2% мөлшерінде ғана болған. Алтын неке жүзіктері бір жылдың ішінде 35,6% қымбаттаған. Бір жыл бұрын баға өсімі 5,7% болған еді. Әсіресе Солтүстік Қазақстан облысында баға 71,6%-ға көбейген. Одан кейін Жетісу (61,7%) и Алматы (60,1%) облыстары тұр. Бір жылда Астана және Алматы қалаларында, Шығыс Қазақстан және Ақмола облыстарында алтын неке жүзігінің бағасы 1,5 есе артқан», - деп жазады Energyprom.kz.

Ресурстың мәліметіне қарағанда, әлемде бағалы тастар саудасы қысқарып келеді.

Rapaport агенттігінің дерегі бойынша, ең ірі алмаз өндіруші компаниялардың бірі De Beers ақпан айында сатылым көлемін бір жыл бұрынғы көрсеткішпен салыстырғанда 24% қысқартқан.

«Бұл компания салмағы 0,75 караттан асатын брилиант бағасын түсірген. Бірақ ұсақ тастардың бағасы керісінше өсіп отыр», - делінген сараптамада.