RUS
SMARTNEWS.KZ басылымының хабарлауынша, Астана – Новосібір бағытындағы ұшақта Қазақстан азаматы қатысқан жанжал орын алды. Оқиға кезінде әйел адам экипаж мүшелеріне тіл тигізіп, ұшақта шу шығарған.
Куәгерлердің айтуынша, жолаушы өз-өзін ұстай алмай, бортбикелерге қол көтерген.
«Әйел айғайлап, боқтық сөз айтып, ұшақты кері бұрғызбақ болды», – деп хабарлаған оқиға куәгері Tengri Travel-ге.
Qazaq Air баспасөз қызметі мәліметінше, оқиға 20 қазанда болған.
«Астана – Новосібір рейсі кезінде экипаж мүшелері мас күйдегі жолаушыға қосымша алкоголь беруден бас тартқан соң, ол бортсеріктерге шабуыл жасаған. Әуе кемесі қонған сәтте Новосібір әуежайында әйелді полиция қызметкерлері күтіп тұрды», – делінген хабарламада.
Компания мұндай әрекеттер үшін заңда қатаң жауапкершілік қарастырылғанын ескертті.
«Борттағы тәртіпті бұзған және қауіп төндірген тұлғалар әуе компаниясының «қара тізіміне» енгізіледі. Экипажға шабуыл жасау немесе ұшу қауіпсіздігіне қатер төндіру әрекеттері үшін әкімшілік немесе қылмыстық жаза қарастырылған, тіпті бас бостандығын шектеуге дейін», – деп мәлімдеді Qazaq Air.
Көлік полициясының дерегінше, 27 жастағы Қазақстан азаматына қатысты «ұсақ бұзақылық» және «денсаулыққа қасақана зиян келтіру» дерегі бойынша қылмыстық іс қозғалған.
«Әйел рейс кезінде қоғамдық тәртіпті бұзып, бортсерікке дене жарақатын салған. Қазір сотқа дейінгі тергеу жүріп жатыр», – деп хабарлады ведомство.