RUS
SMARTNEWS.KZ басылымының хабарлауынша, Шымкент тұрғыны бұрынғы мәслихат депутаты Қуаныш Дәулетәлиевті өзін қорлап, қорқытты деп сотқа берді. Бұл туралы Otyrar жазды.
Азамат Ескендір Жамбаевтың айтуынша, экс-депутат оны көпшілік алдында балағаттап, қорлаған.
«Ол мені қорлап, боқтық сөздер айтты. Тіпті, кек қайтарғысы келіп жүрген шығар. Өйткені мен бұған дейін оның ұлдарына қарсы шағым түсіргем. Кейін олар алаяқтық үшін сотталды», — дейді Жамбаев.
Алайда сот отырысына Қуаныш Дәулетәлиевтің өзі келмеген. Осы себепті сот оның іздеуге жарияланғанын хабарлады.
«Сотталушы сотқа келмегендіктен және келмеу себебі анықталмағандықтан, сот ісін уақытша тоқтатып, оны іздеуге жариялайды», — деді судья Асхат Есенов.
Бұл Дәулетәлиевтің алғаш рет іздеуде болуы емес. Бұған дейін, қыркүйек айында да ол сот процесіне келмей қойған. Сол кезде полиция оны тауып, сотқа мәжбүрлі түрде жеткізген болатын.
Белгілі болғандай, 48 жастағы Қуаныш Дәулетәлиев 2000–2009 жылдары кәсіпкерлікпен айналысқан. Кейін «Сенім-Құрылыс» және «БОИНИС КС» компанияларында коммерциялық директордың орынбасары қызметін атқарған. Сондай-ақ ол мәслихаттағы «Ауыл» партиясы фракциясын басқарған.