RUS
SMARTNEWS.KZ басылымының хабарлауынша, Тараз қаласында күндізгі уақытта белгісіз ер адамдар қызды аялдамада тұрған жерінен көлікке күштеп отырғызып, алып кеткен. Оқиғаның видеосы әлеуметтік желіде тарады. Бұл туралы Halyqstan Telegram-арнасы жазды.
Кадрларда бірнеше адам қызға көмектесуге тырысқанымен, олардың әрекеті сәтсіз аяқталғаны көрінеді.
Жамбыл облысының Полиция департаменті хабарлауынша, әлеуметтік желідегі бейнежазба негізінде тексеру жүргізілген. Нәтижесінде оқиғаға қатысы бар барлық адам анықталып, ұсталған.
«Тексеру барысында тараптардың бір-бірін бұрыннан танитыны және өзара шағымдары жоқ екені белгілі болды», – деп мәлімдеді полиция өкілдері.
Алдын ала мәліметке сәйкес, қызды «жар болуға алып кеткен» болуы мүмкін. Дегенмен оның келісімімен бе, әлде зорлықпен бе – бұл жағы нақты анықталмаған.
Қазір полиция оқиғаның барлық мән-жайын зерттеп, тиісті құқықтық баға беру үшін қосымша тексеру жұмыстарын жүргізіп жатыр.