«XX ғасырдың ең әдемі баласы» атанған актер Бьорн Андресен өмірден өтті
Талайды сымбатымен тамсандырған актер көз жұмды.
SMARTNEWS.KZ басылымының хабарлауынша, Швецияның атақты актері, әлемге «XX ғасырдың ең әдемі баласы» деген атпен танылған Бьорн Андресен 70 жасында қайтыс болды. Бұл туралы шведтік Dagens Nyheter басылымы хабарлады.
Ақпаратты актердің досы әрі режиссер Кристиан Петри растады — ол 2021 жылы Андресен жайлы «Әлемдегі ең әдемі бала» атты деректі фильм түсірген еді.
Бьорн Андресен кино әлеміне 15 жасында келді — ол алғашқы рөлін Рой Андерссонның «Шведтік махаббат тарихы» фильмінде ойнаған.
Алайда оған әлемдік танымалдықты 1971 жылы италиялық режиссер Лукино Висконтидің «Венециядағы өлім» фильмі алып келді. Бұл туынды — Томас Манның сол аттас шығармасының экранизациясы еді. Фильмде Андресен аристократ ұл Тадзионың бейнесін сомдады — оған өмірден түңілген композитор ғашық болады.
Осы рөлінен кейін актерді «XX ғасырдың ең әдемі баласы» деп атай бастады. Бірақ Андресен бұл атаққа да, фильмдегі тәжірибесіне де екіұшты қарады. Кейін ол Висконтидің түсірілім кезіндегі қатал тәртібін және жас актерге көрсеткен қысымын сынға алған. Тіпті режиссер оны гей-барларға ертіп апарып, «рөлге енуге көмектесті» деген.
Фильмнен кейін Андресен біраз уақыт Жапонияда жұмыс істеп, кейін музыканттықпен айналысты. Ол Sven Ericsатты би және музыка тобымен бірге өнер көрсетті.
Бьорн Андресен ақын Сюзанна Романға үйленген. Ерлі-зайыптылардың екі баласы болған — қызы Робин және ұлы Элвин. Өкінішке қарай, Элвин небәрі 9 айлығында кенеттен сәби өлімі синдромынан көз жұмған.
Материал авторы
