RUS
SMARTNEWS.KZ басылымының хабарлауынша, Ресейдің Сыртқы барлау қызметі Франция Украина аумағына 2 мыңнан астам сарбаз бен офицер жөнелтуге дайындалып жатқанын мәлімдеді.
Барлау қызметінің дерегінше, президент Эммануэль Макрон Украинаға қолдау көрсету үшін арнайы легион құруды бұйырған. Қазір бұл әскерилер Польша мен Украинаның шекарасына жақын өңірлерде орналасып, дайындық жаттығуларын өткізіп жатыр.
«Жақын уақытта оларды Украина орталығына жіберу жоспарланып отыр», — делінген хабарламада.
Барлау қызметінің ақпараты бойынша, егер бұл операция жария болып кетсе, Париж ресми түрде «бұл тек нұсқаушылар мен әскери кеңесшілер» деп түсіндіруді көздеп отыр. Сонымен қатар Францияда госпитальдарда қосымша орындар дайындалып, дәрігерлер далалық жағдайда жұмыс істеуге үйретіліп жатқан көрінеді.
Сыртқы барлау қызметі мәлімдемесінде Макронның «Наполеон даңқына жетуді армандайтыны» айтылған:
«Саяси тұрғыдан сәтсіздікке ұшырап, елін әлеуметтік дағдарыстан шығара алмаған Макрон өзін тарихқа қолбасшы ретінде енгізгісі келеді», — дейді Ресей тарабы.
Дегенмен әзірге Франция тарабы да, Киев те бұл даулы мәлімдемеге қатысты ресми пікір білдірген жоқ. Айтылған деректер Сыртқы барлау қызметінің Франция үкіметіне қарсы ақпараттық соққысы болуы да мүмкін.