RUS
SMARTNEWS.KZ басылымының хабарлауынша, Петропавлдағы автожанармай бекеттерінде көлікке арналған газды тек талонмен ғана алу мүмкін — ол да болса жолың болса. Қаланың кейбір станцияларында тіпті ең сұранысы жоғары АИ-92 маркалы бензин де жоқ.
Қазір көлік жүргізушілері бекетке келіп, «Газ жоқ» деген жазуды көріп, үнсіз бұрылып кетіп жатыр. Айқай да, дүрбелең де жоқ — тек дағдарысқа үйреніп қалған тыныштық.
Жанармай тапшылығы тек Петропавлда емес, Солтүстік Қазақстан облысындағы 13 ауданның сегізінде байқалып отыр.
Облыстық энергетика және тұрғын үй-коммуналдық шаруашылық басқармасы мұндай жағдайға өздерінің кінәсі жоқ екенін айтады.
«Атырау мұнай өңдеу зауыты жөндеу жұмыстарына тоқтады. Біз қосымша 2,5 мың тонна отын сұрадық, бірақ бұл көлем бөлінген жоқ», – деді басқарма басшысының орынбасары Қуаныш Шақұбаев.
Оның айтуынша, тапшылықтың тағы бір себебі – егін орағы.
«Қазір элеваторлар да қосымша тұтынушыға айналды. Өткен жылы бұл мақсатқа шамамен мың тонна қосымша газ бөлінген еді, биыл мұндай қолдау болған жоқ», – деді ол.
Қазан айында өңірге 4100 тонна, қарашада 4800 тонна, ал желтоқсанда 5200 тонна газ жеткізіледі деп жоспарланып отыр.
Бүгінде автокөліктерге арналған газдың литрі 112 теңге, ал тұрмыстық газ 117 теңге тұрады.
Солтүстік Қазақстан облысында қазір 19 газ жеткізуші компания жұмыс істейді. Оларға қарасты 122 жанармай құю бекеті бар.