RUS
SMARTNEWS.KZ басылымының хабарлауынша, Ақтау–Астана бағытындағы рейсте FlyArystan әуе компаниясының капитаны жолаушыларға тек орыс және ағылшын тілдерінде ғана үн қатқан.
Оқиға жайлы Threads желісінде beimalim атты қолданушы жазды. Оның сөзінше, қазақ тілінде хабарландыру сұраған кезде жолсерік оған: «не вам решать» деп жауап берген.
«Ұшу кезінде тағы сұрадым: капитан неге қазақша сөйлемейді деп. Әлия Әділбекқызы есімді жолсерік ‘капитан орыс тілді, сондықтан тек екі тілде хабарлайды’ деді. Мен тұтынушы құқығы бұзылып жатқанын айтқанда, ол ‘это не вам решать’ деп жауап қатты», — деп жазды жолаушы өз парақшасында.
FlyArystan бұл жағдайға байланысты түсініктеме беріп, рейсте қазақ тілінде хабарландыру жасалғанын айтты.
«FS7376 Ақтау–Астана рейсінде мемлекеттік тілдегі ақпарат аға бортсерік тарапынан берілді. Жолаушы ұшқыштың жеке өзі қазақша сөйлегенін талап еткен. Ұшу кезінде барлық қажетті хабарландырулар қазақ тілінде орындалды», — деп мәлімдеді компания.
FlyArystanның айтуынша, мұндай тәртіп Қазақстан заңнамасына және халықаралық азаматтық авиация тәжірибесіне сай.
Бұған ұқсас жағдайды басқа Threads қолданушысы да бөлісті. Оның айтуынша, Қостанай–Астана бағыты бойынша ұшқан рейсте де капитан тек орыс және ағылшын тілдерінде сөйлеген.
«Қостанай–Астана рейсімен ұштым. Борт капитаны Степан Подкрытов амандасқанда да, қоштасқанда да қазақша бір сөз айтқан жоқ. Қазақ тіліндегі хабарландыру неге жоқ деп сұрағанда, жолсерік ‘компанияда ондай талап жоқ’ деді», — деп жазды ол.