RUS
SMARTNEWS.KZ басылымының хабарлауынша, Атырау облысының маңындағы Тасқала-2 ауылында салынып жатқан жаңа мектептің сыртқы келбеті әлеуметтік желіде қызу талқыланды. Тұрғындар ғимараттың қара түсті фасады көңілге қонымсыз екенін айтып, оны балаларға арналған мекемеге лайықсыз деп санайды.
«Мектеп салынып жатқаны — қуанышты жаңалық. Бірақ неге ғимаратты қара материалмен қаптаған? Бұл балаларға арналған орын емес сияқты. Мектептің жарық әрі жылы түстермен безендірілгені дұрыс қой. Қазір тек “тапсырып тастау” үшін істелгендей әсер қалдырады», — дейді ауыл тұрғыны.
Тұрғындардың сынынан кейін Атырау облысының құрылыс басқармасы ресми түсініктеме берді.
Ведомство өкілдерінің айтуынша, 600 орындық мектептің құрылысы бекітілген жобалық-сметалық құжаттамаға сай жүргізілуде, ал ғимараттың сыртқы келбеті — қазіргі заманғы сәулет талаптарына сәйкес.
«Фасадтың бір бөлігі графит және сары түстермен безендірілген. Дәл осы бөлік суретке түсіп, ғимарат толығымен қара сияқты әсер қалдырған. Ал шын мәнінде негізгі бөлігі ақ және қоңыр түстерде орындалады. Графит пен сары тек декоративті элемент ретінде қолданылған», — деп хабарлады басқарма.
Мамандардың айтуынша, құрылыс аяқталған соң мектеп заманауи және эстетикалық тұрғыда үйлесімді дизайнмен пайдалануға беріледі.
Жаңа оқу орны бірнеше блоктан тұрады және 600 оқушыға арналған. Құрылысы әлі жалғасып жатыр.