Несиеге өмір сүріп жатырмыз: банктерге қазақстандықтар 16,2 трлн теңге қарыз

SMARTNEWS.KZ басылымының хабарлауынша, Қазақстанда тұтынушылық несиеге деген сұраныс бәсеңдер емес — қазақстандықтар банктерден 16,2 триллион теңге қарыз алған. Бұл өткен жылмен салыстырғанда 25,6%-ға көп.

Қарыздың отаны – Алматы. Мұнда тұрғындар несиеге шамамен 5,1 триллион теңге рәсімдеген. Одан кейін Астана (1,7 трлн теңге) және Шымкент (1,4 трлн теңге) тұр. Үздік үштіктегі барлық қалада қарыз алу қарқыны жыл сайын 30 пайыз шамасында өсіп келеді.

Қарағанды мен Ақтөбе облыстары да несие алу жағынан артта емес – тиісінше 903,7 млрд және 669,8 млрд теңге. Ал ең аз несие рәсімдеген өңірлер – Ұлытау (145 млрд) және Солтүстік Қазақстан (216 млрд)облыстары.

Бұған дейін Ұлттық банк төрағасы Тимур Сүлейменов тұтынушылық несие бойынша жылдық тиімді мөлшерлемені 46%-дан 40%-ға дейін төмендету мүмкін екенін айтқан. Бірақ пайыз азайғанымен, қазақстандықтардың қарызға деген тәуелділігі ғана артып барады.

Экономистердің айтуынша, халықтың табысы өспей, несиелеу қарқыны артса – бұл қаржылық тұрақсыздықтың алғашқы сигналы.