RUS
SMARTNEWS.KZ басылымының хабарлауынша, Алматыдағы «М.» балабақшасында күндізгі тынығу уақытында үш жасар бала шамамен 1,6 метр биіктіктегі екі қабатты төсектен құлап кеткен.
Құлағаннан кейін баланың басы ісіп, әлсіздік пен құсу белгісі байқалған. Оқиға бейнебақылауға түсіп қалған.
Баланың анасы мекеме басшылығы жағдайға бейжай қарап, кешірім сұрамағанын, әрі медициналық тексеру шығынын өтемейтінін айтып ашулы. Ол басқа ата-аналармен бірігіп, қауіпсіздік талаптарын қайта қарауды және ашық екі қабатты төсектерді пайдалануға тыйым салуды талап етуде.
Ал Алматы қаласының Білім сапасын қамтамасыз ету департаменті ата-аналар алдымен баланы медициналық сараптамадан өткізіп, қорытындыны өздеріне жолдауы қажет екенін айтты.
Осыдан кейін ғана балабақшаға әкімшілік шара қолдану мәселесі қарастырылмақ. Сондай-ақ ата-аналар санитарлық қызметке де шағымдануы тиіс.