RUS
SMARTNEWS.KZ басылымының хабарлауынша, Алматы облысында 63 жастағы әйел банк кесірінен өз үйінен айырылып қала жаздады.
Алайда апелляциялық сот оны көшеден қалдырмай, баспанасын сақтап қалуға мүмкіндік берді.
Іс материалдарына сай, зейнет жасындағы тұрғын 2022 жылы 9 млн теңге көлемінде несие рәсімдеген. Мақсаты – өзіне баспана алу. Мерзімі — 88 ай, жылдық үстемақысы — 18%. Қарызды қайтаруды қамтамасыз ету үшін Талғар қаласындағы жалғыз пәтері кепілге қойылған.
Бағалау есебі бойынша, бұл үйдің нарықтық құны — шамамен 25 млн теңге.
2024 жылға қарай қарыз көлемі өсіп, негізгі берешек, сыйақы және айыппұлдарымен бірге 8,8 млн теңгеге жеткен.
Апелляция соты әйелдің жағдайын — зейнеткер екенін, басқа баспанасы жоқтығын ескеріп, тараптарды келісімге келуге шақырды.
Нәтижесінде медиативтік келісім жасалып, әйел қарызды 8,5 млн теңге көлемінде 2025 жылдың тамызынан 2028 жылдың қыркүйегіне дейін бөліп өтеуге міндеттелді.
Ең маңыздысы — төлемдер уақытылы жүргізілген жағдайда пәтерін тартып алу кейінге шегерілді. Осылайша, зейнеткер үйсіз қалудан аман қалды.
Сот алқасы бұл келісімді заңға сай, ерікті түрде жасалған, әділ әрі адамгершілік қағидаттарына сәйкес деп таныды.
Түйін:
– Талғар аудандық сотының 9 сәуірдегі шешімі күшін жойды;
– медиативтік келісім бекітілді;
– іс жүргізу тоқтатылды.
Шешім жарияланған сәттен бастап заңды күшіне енді және шағымдануға жатпайды.