RUS
SMARTNEWS.KZ басылымының хабарлауынша, Вашингтондағы C5+1 бизнес-форумы барысында Қазақстанның Ғылым және жоғары білім министрлігі, Жасанды интеллект және цифрлық даму министрлігі, OpenAI және Freedom Holding Corp. білім және жасанды интеллект саласындағы ынтымақтастық туралы меморандумға қол қойды.
Құжат аясында жоғары және техникалық білім беру жүйесіне жасанды интеллект технологияларын кеңінен енгізу, оқытушылар мен студенттердің цифрлық дағдыларын күшейту, сондай-ақ қазақ және көптілді оқу контентін дамыту қарастырылған.
Бастаманың негізгі бөлігі – елдегі жоғары оқу орындары мен колледждерге ChatGPT Edu платформасын сынақ ретінде енгізу. Бұл оқу, зерттеу және әкімшілік үдерістерде жасанды интеллект мүмкіндіктерін жүйелі түрде пайдалануға жол ашады.
Жоғары білім саласындағы үйлестіруді Ғылым және жоғары білім министрлігі атқарады. Орта, техникалық және кәсіби ұйымдармен өзара іс-қимылды Жасанды интеллект және цифрлық даму министрлігі қамтамасыз етеді. OpenAI технологиялық қолдау мен лицензия ұсынады, ал Freedom Holding Corp. платформаны қаржыландыру мен ұйымдастыруға қатысады.
Министр Саясат Нұрбек бұл келісімді Қазақстанның жоғары білімді жаңғыртудағы маңызды қадам деп атады. Оның айтуынша, жасанды интеллектке негізделген құралдар білім сапасын арттырып, елдің өңірдегі ғылыми-инновациялық әлеуетін күшейтеді.
Министрліктің мәліметінше, меморандумды жүзеге асыру ұлттық AI-экожүйесін қалыптастыруға серпін беріп, білім беру саласын цифрлық дәуір талаптарына бейімдеуге бағытталады.