RUS
SMARTNEWS.KZ басылымының хабарлауынша, Қаржылық мониторинг агенттігінің Қызылорда облысы бойынша департаменті көлік прокуратурасының үйлестіруімен «СПК Қызылорда Балық» серіктестігінің басшылығына қатысты істі аяқтады.
Тергеу қорытындысы бойынша, кәсіпорын басшылары 2022 жылы кеден органдарына жалған мәлімет ұсынып, жалпы құны 254 миллион теңге болатын 75 тоннадан астам көксерке етін Еуропа елдеріне заңсыз экспорттаған.
Балықтың заңды жолмен алынғанын көрсету үшін компания балық өсірумен айналыспаған шаруашылықтардан өнім сатып алынғаны жөнінде жалған құжаттар рәсімдеген. Тексеру кезінде бұл шаруашылықтардағы су айдындарының толықтай кеуіп қалғаны, ал құжаттарда көрсетілген көліктердің шын мәнінде тасымал қызметін атқармағаны және тоңазытқыш жабдықтар болмағаны анықталды.
Сонымен қатар, тергеу барысында жалған шот-фактуралар мен заңсыз берілген ветеринарлық анықтамалар пайдаланылғаны дәлелденді.
Сот шешімімен серіктестік құрылтайшысы А. Ерхатов пен директоры Л. Қайыпназарова кінәлі деп танылып, екеуіне де екі жыл мерзімге бас бостандығын шектеу жазасы тағайындалды. Мемлекет пайдасына 254 миллион теңге көлеміндегі заңсыз табыс қайтарылды.
Үкім заңды күшіне енген жоқ.