RUS
SMARTNEWS.KZ басылымының хабарлауынша, Астананың сотында Қуандық Бишімбаевтың анасы Альмира Нұрлыбекова бойынша іс қаралуда. Сотта әйел 990 мың долларды туысына сақтау үшін бергенін айтты. Прокурор осы қаржының шығу тегін сұрап, оның отбасылық қаржы тарихын анықтағысы келді.
Сотта Альмира Нұрлыбекова өзінің табысқа жету жолын, жеке бизнесін қалай бастағанын еске алды. Ол 1993 жылдан бері кәсіпкерлікте екенін, 2002 жылы көтерме саудамен айналысып, азық-түлік өнімдерін Мәскеуден жеткізгенін айтты.
«Бастапқы капиталым шамамен 200 мың доллар болды. Сол ақшадан кейін мен мектеп аштым, SPA-салон құрдым. Таразда оқу орталығын ашып, кейін университетке дейін жеткіздім. 2006-2007 жылдары бизнесімді дамытуға шамамен миллион доллар жұмсадым», – деді ол.
Сонымен қатар, Нұрлыбекова химия ғылымдарының кандидаты, доцент екенін, бірақ кәсіпкерлік қабілеті 2000 жылдардың басында көріне бастағанын атап өтті. Шымкентке көшкеннен кейін ол қосымша білім беру саласында жұмыс істеп, ауданнан келген жастарға екінші білім алуына көмектескен. Шаштараздарды, есепшілерді, компьютер мамандарын оқытқан. Сол уақытта консалтингтік компания ашып, менеджмент, ISO сертификаттау және басқарушылық дағдыларды дамытқан.
Альмира Нұрлыбекова сотта қаржылық қысымға шыдамай жылап, отбасының күйзеліске түскен кезін айтып берді. Ол бұл қаражатты көп жыл еңбекпен жинағанын, ешқандай заңсыз жолмен ақшаны таппағанын жеткізді.