RUS
SMARTNEWS.KZ басылымының хабарлауынша, Астана қаласы бойынша Қаржылық мониторинг агенттігінің департаменті Беларусь азаматы, Mellstroy лақап атымен танымал блогер Андрей Буримді халықаралық іздеуге жариялады. Бұл ақпарат ведомствоға жолданған журналистер сұрауына жауап ретінде ресми түрде расталды.
1988 жылы туған Буримге қатысты сот қамауда ұстау түріндегі бұлтартпау шарасын санкциялаған. Тергеу оны әлеуметтік желілер арқылы «Mellstroy.game» онлайн-казиносын ілгерілетуге бағытталған ауқымды жарнамалық кампания ұйымдастырды деп күдікке іліктіріп отыр. Контент Қазақстан қолданушыларына да бағытталған.
Онлайн-казиноны жылжытудағы схемалар
Блогер түрлі ұтыстар мен челлендждер ұйымдастырып, қатысушылардан TikTok, YouTube Shorts және өзге платформаларда Mellstroy.game атауын, логотиптерін және сайт сілтемелерін көрсететін видеолар түсіруді талап еткен.
Бұған дейін Бурим Ресейде тікелей эфир кезінде кісіні соққыға жыққаны үшін түзету жұмыстарын жасап, айыппұл арқалаған. Сонымен қатар, 2025 жылғы қарашада Минск қалалық соты блогердің барлық платформалардағы арналары мен логотиптерін экстремистік материал деп таныды.
Даулы контент және Қазақстандағы қатысушылар
Mellstroy әлеуметтік желілерде миллиондаған аудитория жинаған: Instagram-да үш миллионнан астам, Telegram-да шамамен бір миллион жазылушысы бар. Ол атышулы стримдер, қызды соққыға жыққан іс, құмар ойындарды жарнамалау және шектен шыққан челлендждер арқылы танымал болды.
Қазір блогер ең креативті видеолар үшін пәтер ұтысын жариялап отыр. Іс жүзінде бұл онлайн-казиноны жарнамалаудың бір тәсілі. Аталған марафонға қазақстандықтар да қатысып жатыр. Мысалы, Талдықорған тұрғыны жеңіске жету үшін ресми түрде есімін «Гейм Меллстрой Серікұлы» деп өзгерткен. Ал Астанадағы тағы бір қатысушы MEGA Silk Way орталығында жартылай жалаңаш жүгіріп, нәтижесінде 15 тәулікке қамалған.
Ведомство іздеу жарияланған тұлға туралы мәліметі бар азаматтарды Астана қаласының Экономикалық тергеп-тексеру департаментіне хабарлауға шақырады. Анонимдік және сыйақы қарастырылған.
Агенттік Қазақстан заңнамасында құмар ойындарды жарнамалағаны үшін әкімшілік жауапкершілікпен қатар, заңсыз ойын бизнесіне қатысушы немесе көмектесуші тұлғаларға қатысты қылмыстық жауапкершілік те көзделгенін ескертті.
Күмәнді жарнамалық ұсыныстар түскен жағдайда азаматтар «АФМ Insider» Telegram-ботына хабарлауы тиіс. Анонимдік сақталады.