RUS
SMARTNEWS.KZ басылымының хабарлауынша, Абай облысының Үржар ауданында төрт баланың өліміне себеп болған ауыр жол-көлік оқиғасына қатысты қылмыстық іс сотқа жіберілді. Іс қылмыстық істер жөніндегі мамандандырылған ауданаралық сотқа түсті. Ол ҚР ҚК-нің 345-бабы 4-бөлігі бойынша ашық режимде қаралады.
Соттың баспасөз қызметінің хабарлауынша, материал қазір алдын ала тыңдау сатысында. Негізгі сот отырыстарының басталу күні әлі бекітілген жоқ.
Алдын ала тыңдауда істің бүкіл материалдары зерделеніп, тараптардың құрамы нақтыланады және процесске дайындық жүргізіледі. Сот отырыстарының ресми кестесі белгіленген соң қосымша ақпарат таратылады.
Еске салсақ, қайғылы оқиға 19 тамызда болған. Toyota көлігінің жүргізушісі үйінің маңында ойнап жүрген балаларды қағып кеткен. Екі бүлдіршін оқиға орнында көз жұмды, тағы бір бала жедел жәрдем жолында жан тапсырды. Үш бала жарақат алып, медициналық көмекке жүгінген.
Президент тапсырмасымен жараланғандарға көмек көрсету үшін Үржарға әскери ұшақ жіберілген еді. Кейін жағдайы тұрақталған екі бала санитарлық авиациямен Астанаға жеткізіліп, қыркүйек басында ауруханадан шығаруға дайын екені хабарланған.
Ал ең ауыр жарақат алған қыз бала аудандық ауруханадан Семей қаласына әуе арқылы жеткізілді. Өкінішке қарай, дәрігерлер оның өмірін құтқара алмады.