RUS
SMARTNEWS.KZ басылымының хабарлауынша, Премьер-министр Олжас Бектенов Сенат отырысында бюджет шығыстарын оңтайландыруға қатысты сұраққа жауап бере отырып, алдағы үш жылда әлеуметтік қолдау жүйесінің қайта қаралатынын мәлімдеді.
Үкімет басшысының айтуынша, жаңа бюджетте базалық шығыстар 15 пайыздан 12 пайызға дейін қысқартылғанымен, әлеуметтік сала әлі де негізгі жүктемені көтеріп отыр. Әлеуметтік төлемдер мен әртүрлі қолдау шаралары мемлекеттік бюджеттің 60 пайызына жуығын құрайды.
Бектенов бұған дейін республикалық бюджетте әлеуметтік шығыстар ұзақ жылдар бойы 40 пайыздан жоғары болғанын еске салды. Үш жылдық жоспарды әзірлеу кезінде бұл көрсеткіш 38 пайызға дейін төмендетілген.
Премьер-министр мемлекет қолдауы кімге бағытталатынын да нақтылады. Оның сөзінше, түрлі объективті себеппен еңбекке қабілетсіз азаматтар ғана әлеуметтік төлемдерге үміт арта алады.
«Жұмыс істей алатын адам жұмыс істеуі тиіс. Мемлекет жұмысқа жарамды азаматтарды қамқорлығында ұстамауы керек және ұстамайды да», деді Бектенов.