RUS
SMARTNEWS.KZ басылымының хабарлауынша, Павлодар облысы бойынша Қаржылық мониторинг агенттігінің департаменті «Богатырь Көмір» кәсіпорнындағы ірі ұрлық фактісі бойынша тергеу жүргізіп жатыр. Кәсіпорынның жарғылық капиталының 50%-ы «Самұрық-Қазына» қорының иелігінде.
Тергеу дерегінше, бір топ бизнесмен кәсіпорынға бұрын қолданылған қосалқы бөлшектерді жаңа өнім ретінде өткізіп отырған. Бұл іске «Богатырь Көмірдің» тауар қабылдауына жауапты қызметкер де тартылған. Ол тозған, ақауы бар бөлшектерді еш кедергісіз қабылдап, олардың талапқа сай екенін ресми түрде растаған.
Екі жыл бойы реакторлар, цилиндр блоктары, автосцепкалар мен тежегіш жүйелерінің элементтері жалған сертификаттар арқылы «жаңа» өнім ретінде жеткізіліп отырған.
Кәсіпорынға келтірілген залал — 123 млн теңге.
Тергеу мәліметінше, ақша бақылаудағы жеке кәсіпкерлер мен фирмалар арқылы жалған келісімшарттар негізінде шығарылып, кейін қолма-қолға айналдырылған.
Тәркілеу кезінде күдіктілерден 27 млн теңге табылған.
Сот шешімімен алты автокөлікке — Cadillac Escalade, Range Rover, Toyota Land Cruiser 250 және тағы бірнеше машинаға — тыйым салынды.
Қазіргі уақытта үш күдікті қамауға алынды. Тергеу жалғасып жатыр.
Қылмыстық істің басқа деректері ҚПК-нің 201-бабына сай жариялауға жатпайды.