RUS
«Қырғыз тарапы да Күдебаевтің мемлекеттік шекараны заңсыз кесіп өтуіне қатысты қылмыстық іс қозғады. Яғни қылмыстық іс оны іздестіру бойынша ғана емес, мемлекеттік шекараны заңсыз кесіп өту фактісіне қатысты да қозғалып отыр. Біз Күдебаевтің мемлекеттік шекараны заңсыз кесіп өтуін ұйымдастырғандарды да анықтамақпыз. Сондықтан қырғыз тарапының көмегі қажет. Мемлекеттік шекарадан заңсыз өтуіне кімнің және қалай көмек көрсеткені маңызды», - деді Бас прокурордың орынбасары Жандос Өмірәлиев Мәжілістің жалпы отырысынан кейін тілшілердің сауалына жауап бере тұрып.
Оның айтуынша, Қазақстанның Түркиямен құқықтық көмек көрсету туралы екіжақты келісімі бар. Оның шеңберінде түрік тарапымен жұмыс қолға алынды.
«Бүгінде мемлекеттік шекараны заңсыз кесіп өту фактісі бойынша қылмыстық іс қозғалды. Барлық фактілер жан-жақты зерттеледі. Аталған іспен Бас прокуратураның арнайы қызметі айналысып жатыр. Күдебаевқа қолдау көрсеткен және мемлекеттік шекараны заңсыз кесіп өту үшін жағдай жасаған барлық өңірді қамтитын боламыз», - дейді ол.