RUS
Қолданыстағы заңнамада түнгі уақытта кәмелетке толмағандардың заңды өкілінсіз қоғамдық және ойын-сауық орындарында жүруін шектеу – балаларды мүмкін болатын қауіп-қатерден қорғауға бағытталған негізгі талаптардың бірі болып белгіленген.
ӘҚБтК-нің 442-бабы талаптарына сәйкес (статистикалық мәліметтер qamqor.gov.kz порталынан алынған):
1-бөлігі – кәмелетке толмағандардың түнгі уақытта заңды өкілдерінің еріп жүруінсіз сағат 22-ден таңғы 6-ға дейін ойын-сауық мекемелерінде болуы үшін заңды өкілдеріне 3 айлық есептік көрсеткіш мөлшерінде айыппұл салуға әкеп соғады (2025 жылы бұл 11 796 теңгені құрайды). 2025 жылдың 10 айында осы тармақ бойынша 3 820 тұлға жалпы 23 788 151 теңге сомасына айыппұл түріндегі әкімшілік жауаптылыққа тартылды.
2-бөлігі – кәмелетке толмағандардың заңды өкілдерінің еріп жүруінсіз тұрғынжайдан тыс жерде сағат 23-тен таңғы 6-ға дейінболуы үшін заңды өкілдеріне ескерту жасауға әкеп соғады. Бұл норма бойынша 104 мыңнан астам тұлғаға ескерту берілген.
3-бөлігі – әкімшілік жаза қолданылғаннан кейін бір жыл ішінде қайталап жасалған әрекеттері үшін заңды өкілдеріне 7 айлық есептік көрсеткіш мөлшерінде айыппұл салуға әкеп соғады (2025 жылы – 27 524 теңге). Осы тармақ аясында 6 634 тұлғаға жалпы 104 875 623 теңге көлемінде айыппұл салынған.
Түнгі уақытта балалардың қараусыз қалуы түрлі қауіп-қатерлерге алып келуі мүмкін. Осыған байланысты ішкі істер органдары, мектеп инспекторлары және жергілікті атқарушы органдар түнгі рейдтер, профилактикалық тексерістер, ата-аналармен түсіндіру жұмыстары және білім беру ұйымдарымен бірлескен іс-шараларды күшейтуде.
Бұл шаралар заң мен тәртіп идеологиясының мақсатына толық сәйкес келеді, яғни құқық бұзушылықтың алдын алу, балалардың қауіпсіздігін қамтамасыз ету, сондай-ақ ата-аналардың жауапкершілігін арттыру қоғамдағы тәртіп пен заңдылықты нығайтудың маңызды тетігі болып табылады.
Бас прокуратураның жанындағы
Құқық қорғау органдары академиясының
Прокурорлық қадағалау кафедрасының аға оқытушысы
А. Жарылғасынқызы