RUS
SMARTNEWS.KZ басылымының хабарлауынша, Абай облысында жұмысқа вахталық әдіспен баратын қызметкерлер мінген пойызда әріптесін ұрып-соққан тұрғынға сот жаза тағайындады. Қылмыс жасаған 38 жастағы ер адам бүгінде қоғамдық жұмыстарды орындап жүр.
Ведомствоның дерегінше, пойыз вагонында әріптестер арасында сөз қайшылық туып, ер адам жанжал кезінде қарсы алдындағы қызметкерін бірнеше рет ұрған. Жәбірленуші түрлі жарақат алған. Сот кінәліні айыпты деп танып, 90 сағат қоғамдық жұмысқа міндеттеді.
Ол Аягөз аудандық пробация қызметіне есепке алынды. Мамандар оған жазаны өтеу тәртібін, құқықтары мен міндеттерін түсіндіріп, сот белгілеген жұмыстан жалтарған жағдайда қандай жауапкершілік болатынын ескертті.
Сөзіне қарағанда, ер адам ажырасқан, бір кәмелетке толмаған баласы бар, қазір ата-анасының қолында тұрады. Жазаны орындау үшін оны жергілікті коммуналдық кәсіпорындардың біріне жұмысқа орналастырған. Қызметкерлер оның міндеттерін адал атқарып, еңбек тәртібін сақтап жүргенін айтады. Пробация қызметі оның жұмысын тұрақты бақылауда ұстайды.
Қызмет басшысы Ермек Қалиевтің айтуынша, мұндай шаралар сот үкімін орындаумен қатар, қайталанатын құқық бұзушылықтың алдын алуға бағытталған.
Өз кезегінде сотталған азамат:
«Бір сәттік ашу тыныш өмірімді шайқалтты. Қандай агрессия болса да, оның заң алдындағы салдары болатынын түсіндім. Жазамды толық атқарып, мұндай жағдайдың қайталануына жол бермеймін» деп мәлімдеді.