RUS
SMARTNEWS.KZ басылымының хабарлауынша, Илон Маск АҚШ-тың қазіргі вице-президенті Джей Ди Вэнсті болашақта елді сегіз жыл басқарады деп санайды. Бұл пікірін ол 22 қарашада Үкімет тиімділігі департаментінің (DOGE) бұрынғы қызметкерлерімен өткен жабық онлайн-кездесуде айтқан. Аталған мәлімдеме туралы «Politico» басылымы жазды.
Кездесу трансляцияланбаған. Онда Маск АҚШ «алдағы 12 жылдық тарихи кезеңнің табалдырығында тұр» деп мәлімдеді. Ол 12 жылдық циклге Дональд Трамптың басталған екінші мерзімін және өзінің болжамынша, Джей Ди Вэнстің екі президенттік мерзімін қосып отыр.
Басылым дерегінше, Маск пен Вэнс арасында жақсы қарым-қатынас қалыптасқан. Вэнс 2028 жылғы сайлауға қатысты ресми мәлімдеме жасаған жоқ. Ал Трамп Конституцияның 22-түзетуіне сәйкес үшінші рет сайлауға түсе алмайды.
Маск кездесуде өзін «қастандық жасалуы мүмкін негізгі нысаналардың бірі» ретінде атады. Оның айтуынша, дәл осындай қауіп Трамп пен Вэнске де төніп тұр. Миллиардер шараға қауіпсіздік себептерімен офлайн қатыспай, видеобайланыс арқылы сөз сөйлеген. Жиында DOGE-дің шамамен 150 қызметкері мен олардың туыстары болған.