RUS
SMARTNEWS.KZ басылымының хабарлауынша, Мәжілісте депутат Ермұрат Бәпи Премьер-Министрдің орынбасары Қанат Бозымбаевқа мемлекеттік қаржымен ашылған отандық өндіріс орындарының жартылай қуатта ғана жұмыс істеуіне қатысты өткір сауал жолдады. Сәрсенбілік отырыста депутат импортқа тәуелділіктің артқанын сынап, Үкіметтен нақты шара талап етті.
Бәпи еліміздің өз өнімін шығаратын кәсіпорындарды қолдау саясаты қағаз жүзінде қалып отырғанын айтты.
«Мемлекеттік несиелермен салынған кәсіпорындар 40-50 пайыз қуатпен жұмыс істеп тұр. Бюджет қаржысына зауыт саламыз да, кейін оларды нарықтан лақтырып тастаймыз», — деді депутат.
Ол әсіресе азық-түлік нарығындағы жағдайды өткір сынға алды.
«Нарықты Ресей мен Беларусь тауарлары жаулап алды. Ит емес, кит өлген Жаңа Зеландиядан сары май тасимыз. Тоңазытқышы жоқ қазақ қарынға салып май жасаған халықпыз. Мынау позор ғой, кит өлген Жаңа Зеландиядан май тасу деген. Өз зауыттарымыз тоқтап тұрғанда Балтық елдерінен май әкелу — сорақылық», — деді Бәпи.
Депутаттың айтуынша, мемлекеттік құрылыс жобалары үшін салынған зауыттар да банкроттың алдында тұр.
«Самұрық-Construction салдырған кәсіпорындарда айналым жоқ. Үкіметтің бұл мәселеде монолитті ұстанымы байқалмайды. Мемлекеттік бағдарлама қажет», — деп түйді ол.
Вице-премьер Қанат Бозымбаев депутат сауалына әзіл араластырып жауап берді.
«Бұл сұраққа бір ауыз сөзбен жауап беру мүмкін емес. Айтқандарыңыздың бір бөлігі — популизм, бір бөлігі — шынымен де экономикалық күрделі мәселе», — деп күлді ол.
Бозымбаев отандық тауар өндірушілердің бәсекеге қабілетті болуы бірінші кезекте өздеріне байланысты екенін айтты.
«Сүт бағытында қаншама субсидия берілді. Сүт зауыттарына да көмек көрсетіліп жатыр. Бірақ әлі ішкі сұранысты толық жаба алмай отырмыз», — деді вице-премьер.
Ол отандық өнім өндірушілерді қолдаудың жаңа механизмі іске қосылып жатқанын хабарлады.
«Заңға өзгерістер енгізілді. Енді барлық өндіруші ‘Отандық өнім реестріне’ енгізіледі. Реестрге кірген компаниялар Самұрық-Қазына мен мемлекеттік органдар тарапынан преференциялар алады», — деді Бозымбаев.
Оның айтуынша, коммуналдық және энергетикалық инфрақұрылымды жаңғыртуға 6 триллион теңгеден астам қаржы қарастырылған.
«Соның шамамен 2 триллионы отандық өндірушілердің тауарларын сатып алуға бағытталады. Құбыр, трансформатор, электр желісі — бәрі алдымен өзімізден алынады», — деді ол.
Дегенмен вице-премьер бұл қадамдардың кейбірі әлі халықаралық міндеттемелерге толық сай келмейтінін мойындады.
«Әр тауар бойынша жеке шешім керек. Жүйелі жұмыс жүріп жатыр», — деп жауап берді Бозымбаев.