RUS
SMARTNEWS.KZ басылымының хабарлауынша, Қазақстанда жемқорлардан тәркіленген қаражат есебінен 89 мектеп салынуда. Бұл туралы Kazinform агенттігі жазды.
Президент тапсырмасымен құрылған және коррупциялық жолмен алынған мүлікті өткізу арқылы толықтырылатын Білім инфрақұрылымын қолдау қоры оқу орындарындағы орын тапшылығын азайтуға бағытталған жобаларды қаржыландырып келеді. Қор қаражаты жаңа мектептер тұрғызуға, ескі ғимараттарды жаңартуға және қосымша корпустар салуға жұмсалуда.
Инфрақұрылымды дамыту департаментінің басқарма басшысы Жайық Махсутовтың айтуынша, басты мақсат – балалар үшін қауіпсіз әрі қолайлы білім ортасын қалыптастыру. Оның мәліметінше, қазіргі таңда жалпы сыйымдылығы 86 мың оқушыны қамтитын 77 мектеп пайдалануға берілген. Нысандардың басым бөлігі Алматы, Түркістан, Қызылорда, Жамбыл облыстарында және Астанада орналасқан.
Білім министрлігінің дерегіне сәйкес, қор қаражаты есебінен барлығы 100 мыңға жуық оқушыға арналған 89 мектептің құрылысы жүріп жатыр.