Астанада оқушы қызды ұрып-соққан баланың ата-анасы ірі көлемде өтемақы төлемек

SMARTNEWS.KZ басылымының хабарлауынша, Астанадағы мектептердің бірінде оқушылар арасындағы жанжал ауыр жарақатпен аяқталды. Мектеп оқушысы сыныптасын соққыға жығып, нәтижесінде қыз бала омыртқасының жабық сыну жарақатын алған. Бұл орташа ауырлықтағы дене жарақаты ретінде танылды. Оқиғаға қатысты істі елордалық кәмелетке толмағандар ісі жөніндегі мамандандырылған сот қарады.

Сот мәліметінше, жарақат алған оқушы қыз ұзақ уақыт физикалық шектеулерге тап болған. Психолог қорытындысы да оның моральдық қысым мен күйзеліс өткергенін растады. Қыздың анасы моральдық шығын ретінде 1,5 миллион теңге өндіруді талап еткен.

Ал жауапкер тарап баланың кінәсін мойындағанымен, салдар «өте ауыр емес» деген уәж айтып, отбасындағы қаржылық жағдайды алға тартқан. Олар 100 мың теңге көлемінде өтемақы төлеуге дайын екенін жеткізген.

Сот тараптардың уәждерін зерттеп, дәлелдерді бағалай келе, істі ішінара қанағаттандырды. Шешім бойынша, жәбірленуші тарапқа 300 мың теңге көлемінде моральдық өтемақы өндірілетін болды.

Қарар шығару барысында сот бірнеше факторды ескерді:
– зорлық көрсеткен бала 14 жасқа толмаған;
– әрекетті қасақана емес деп бағалаған;
– өтемақы мөлшері әділ әрі шамадан тыс болмауы тиіс;
– жауапкер отбасының материалдық жағдайы;
– жәбірленушінің моральдық зардап шеккені, бірақ оның шегіне жеткен немесе ерекше ауыр деңгейде болмауы.

Сот жәбірленушінің ата-анасына емдеу шығындарын кейін бөлек талап етуге болатындығын да түсіндірді. Шешім заңды күшіне енді.