RUS
SMARTNEWS.KZ басылымының хабарлауынша, Қарағандыда көпқабатты үйдің пәтерінен 15 және 18 жастағы екі жасөспірімнің мәйіті табылды. Алдын ала деректер бойынша, олардың денесінде зорлық белгілері жоқ. Бұл туралы облыстық полиция департаменті хабарлады.
Оқиға жайлы алғаш ақпарат Telegram-арналардың бірінде тарады. Онда пәтерді жалға алған жігіт таңертең үй иесі келген кезде бір жасөспірімнің жансыз жатқанын, қалған үшеуі комада болғанын алға тартқан. Арна дерегінше, олар дереу ауруханаға жеткізілген, ал 18 жастағы ер бала мен 15 жастағы жеткіншектің өліміне алдын ала болжам бойынша артық дозада зат қолдану себеп болуы мүмкін.
Алайда полиция бұл ақпараттың бір бөлігін растамады. Ведомство тек екі жасөспірімнің мәйіті табылғанын, денелерінде сыртқы жарақат жоқ екенін хабарлады.
Полиция ҚР ҚК аясында қылмыстық іс қозғады.
«Полиция барлық мән-жайды анықтау үшін қажетті тергеу және жедел шаралардың толық кешенін жүргізіп жатыр. Тергеу барысы облыстық полиция департаментінің бақылауында. Заңнамаға сәйкес процессуалдық шешім қабылданады», — деп мәлімдеді ведомство.
Тергеу мүддесіне байланысты өзге ақпарат жария етілмейді.