RUS
SMARTNEWS.KZ басылымының хабарлауынша, Атырау облысында қолайсыз ауа райының салдары тіркелді. Дауыл Индер, Мақат, Махамбет, Құрманғазы аудандарына және Атырау қаласына әсер еткен.
Облыс әкімдігінің мәліметінше, 14 желтоқсанда Индер ауданында желдің екпіні 30 м/с-қа, Атырау қаласында 24 м/с-қа дейін жеткен. Төтенше жағдайлар қызметтері күшейтілген режимде жұмыс істеп жатыр.
Индер ауданында алты нысанның шатыры бүлінген. Мақатта мектептің шатыры зақымданды. Махамбет ауданында аудандық емхана мен көпқабатты тұрғын үйдің шатыры ұшқан. Құрманғазы ауданында мектеп, мәдениет үйі, амбулатория және спортзал зардап шеккен. Атырау қаласында жеті нысанның шатыры мен қасбеті бүлінді. Исатай мен Қызылқоға аудандарында жағдай тұрақты.
Электр желілерінде 105 апат тіркеліп, ақауларды жоюға 40 бригада тартылған. Қазіргі таңда апаттардың басым бөлігі қалпына келтірілген.
Облыс әкімі Серік Шәпкенов зақымданған нысандарды оқшаулауды, қауіпті аумақтарға адамдарды жібермеуді және әлеуметтік нысандарды қалпына келтіру бойынша есептерді жедел дайындауды тапсырды. Балалардың қауіпсіздігі үшін мектептер ауа райы толық тұрақталғанға дейін онлайн оқытуға көшіріледі.