Италияда Димаш Құдайбергеннің жанкүйерлері аутист балаларға 1,5 млн теңге жинап берді

SMARTNEWS.KZ басылымының хабарлауынша, Италияда Димаш Құдайбергеннің жанкүйерлері аутизммен ауыратын балалар мен жасөспірімдерге көмек көрсету үшін қайырымдылық шарасын ұйымдастырды. Бұл бастама Қазақстандық әншінің өмірі мен шығармашылығына арналған мақаланың жариялануы арқылы жүзеге асты. Мақала «Димаш Құдайбергеннің даусы мен аутизм» деп аталып, Spazio Asperger платформасында жарық көрген. Мақала итальяндық Dears қауымдастығының назарын аударды. Бұл туралы Dimashnews.kz жазды.

Мақалада аутизм спектрі бұзылысы бар адамның жеке тәжірибесі баяндалған. Ол Димаш Құдайбергеннің даусының оның эмоционалдық теңгерімін сақтап, айналасындағы адамдармен ашық болуына көмектескенін атап өткен. Бұл жарияланым үлкен қызығушылық тудырып, итальяндық жанкүйерлер арасында белсенді талқыланған және қайырымдылық шарасына қолдау көрсеткен.

Димаштың жанкүйерлері қайырымдылық шарасын өз беттерімен ұйымдастырып, бірнеше күннің ішінде 2350 еуро жиналды. Қаражат Mondoabaut ассоциациясына жіберілді, ол аутизммен ауыратын балалар мен жасөспірімдерге және олардың отбасыларына қолдау көрсетеді.

Mondoabaut ассоциациясын Мара Навони құрған, оның ұлына «аутизм» диагнозы қойылғаннан кейін. Ұйым аутизммен ауыратын балалар мен жасөспірімдер үшін жеке бағдарламалар жасап, білікті мамандармен жұмыс істейді. Олардың жобаларының бірі — Ma’amul деп аталатын инклюзивті кондитерлік зертхана, онда қатысушылар практикалық дағдыларды үйреніп, қауіпсіз, өмірге жақын ортада әлеуметтік жұмыс дағдыларын меңгереді.

Мара Навони бұл бастаманың маңыздылығын атап өтіп, Димаш Құдайбергеннің жанкүйерлерінің қолдауы әлеуметтік жобалардың тұрақтылығын қамтамасыз етуге көмектесетінін айтты. Ассоциация болашақта Димаш Құдайбергеннің есімімен байланысты жеке жобаны іске асыруды жоспарлап отырғандарын да хабарлады.