RUS
SMARTNEWS.KZ басылымының хабарлауынша, Семей қаласында стоматологиялық клиникада жүкті әйелге қатысты дау туғызған видеодан кейін ер адам әкімшілік жауапкершілікке тартылды. Сот шешімімен ол 5 тәулікке әкімшілік қамауға алынды.
Абай облысы соттарының ресми Telegram-арнасының хабарлауынша, Семей қаласының мамандандырылған ауданаралық әкімшілік құқық бұзушылықтар жөніндегі соты ер адамға қатысты істі қараған. Ол ҚР Әкімшілік құқық бұзушылық туралы кодексінің 434-бабының 1-бөлігі бойынша — қоғамдық орында балағат сөздер айту және азаматтарды қорлайтын әрекеттер жасау дерегімен жауапқа тартылған.
Сотта анықталғандай, 2025 жылғы 17 желтоқсанда сағат 10:30 шамасында азамат медициналық клиника ғимаратында әйел адамға тіл тигізіп, қоғамдық тәртіп пен айналасындағылардың тыныштығын бұзған.
Сот қаулысымен ер адам кінәлі деп танылып, 5 тәулікке әкімшілік қамау жазасы тағайындалды. Қаулы әзірге заңды күшіне енген жоқ.
Айта кетейік, бұған дейін әлеуметтік желілерде Семейдегі стоматологиялық клиникада түсірілген видео тараған болатын. Онда ер адамның жүкті әйелге күш көрсеткені айтылған. Алдын ала мәлімет бойынша, жанжал дәрігер қабылдауына кезекке байланысты шыққан.
Жүкті әйелдің айтуынша, басқа келуші кезексіз өтуге тырысып, оны балағаттай бастаған. Әйел бейнежазбаға түсіре бастаған сәтте ер адам оған жүгіріп келіп, қолын бұрап, ұялы телефонын жұлып алған.
Полиция қызметкерлері оқиғаға қатысушыны жедел ұстап, іс материалдарын сотқа жолдаған.