RUS
SMARTNEWS.KZ басылымының хабарлауынша, Жетісу облысында бұған дейін жемқорлық үшін сотталған азамат алаяқтық дерегі бойынша қайта сотталып, ұзақ мерзімге бас бостандығынан айырылды. Бұл туралы облыстық сот мәлімдеді.
Ескелді аудандық соты Қылмыстық кодекстің 190-бабы 3-бөлігінің 1 және 4-тармақтары бойынша (алаяқтық) қозғалған істі қарады. Тергеу мен сот барысында анықталғандай, сотталушы 2023 жылдың күзінде және 2024 жылдың ақпан айында екі азаматты Талдықорған қаласынан пәтерді төмен бағамен алып беремін деп алдап, олардың ақшасын иемденген.
Сот шешіміне сәйкес, бір жәбірленушіге 6 миллион теңге, екіншісіне 4 миллион 540 мың теңге көлемінде материалдық шығын келтірілген. Жалпы келтірілген залал 10,5 миллион теңгеден асты.
Сот отырысында айыпталушы кінәсін жартылай мойындап, азаматтық талаптарды қабылдағанымен, «Амнистия туралы» заңды қолдануды сұраған. Алайда сот оның ақшаны алдау жолымен алғанын анықтап, бұл уәждерді негізсіз деп таныды. Сондай-ақ сотталушының бұрын сыбайлас жемқорлық қылмысы үшін сотталғаны белгілі болды.
Жаза тағайындау кезінде сот оның кәмелетке толмаған баласының барын ескеріп, ауырлататын мән-жайларды анықтаған жоқ.
Сот үкімімен ер адам қылмыстардың жиынтығы бойынша 5 жыл 6 ай мерзімге бас бостандығынан айырылып, орташа қауіпсіздіктегі қылмыстық-атқару жүйесі мекемесінде жазасын өтейтін болды. Сонымен қатар оған өмір бойына мемлекеттік және өзге де лауазымдарды атқару құқығынан айыру жазасы тағайындалды.
Бұрын өтелген жаза мерзімі жалпы жаза мерзіміне есептелді. Жәбірленушілердің азаматтық талаптары толық көлемде қанағаттандырылды.
Үкім заңды күшіне енген жоқ.