RUS
SMARTNEWS.KZ басылымының хабарлауынша, Жетісу облысында мысықты кір жуатын машинаға салып «жуындырған» әйел қоғам наразылығын туғызды. Оқиға сәті түсірілген видео әлеуметтік желіде тарап, көпшіліктің ашу-ызасын оятты.
Бейнежазбадан кір жуғыш машинаның ішінде үрейленіп отырған мысық анық көрінеді. Видеоны әйелдің өзі түсіріп, желіге жариялаған. Желі қолданушылары бұл әрекетті жануарларға қатыгездік деп бағалап, e-Otinish платформасы арқылы полицияға жаппай шағым түсірген.
Пікір қалдырған азаматтар әйелдің медицина саласында жұмыс істейтіні туралы ақпаратқа алаңдаушылық білдіріп, оның кәсіби этикасына күмән келтірді. Қоғам өкілдері мұндай әрекетке жол берген адамға тиісті құқықтық баға берілуі тиіс екенін талап етті.
Аталған дерекке қатысты Stan.kz тілшісіне Жетісу облысы полиция департаменті түсініктеме берді. Ведомство мәліметінше, оқиға желіде тарағаннан кейін жануарларға қатыгездік көрсету дерегі бойынша тексеру басталған.
Полицияға берген түсініктемесінде мысық иесі бұл әрекетін «әзіл ретінде» жасағанын айтқан. Оның сөзінше, кір жуғыш машинаға су қоспай, құрылғыны бір рет қана айналдырып, жануарды бірден шығарған. Тексеру аясында мысық ветеринар маманның қарауынан өткен.
«Ветеринарлық қорытындыға сәйкес, қазіргі уақытта жануардың өмірі мен денсаулығына қауіп жоқ», – деп хабарлады полиция.
Сонымен қатар құқық қорғау органдары мысық иесінің жануарларға қатыгездік көрсеткені үшін әкімшілік жауапкершілікке тартылғанын растады. Полиция өкілдері жануарларға зиян келтіретін кез келген әрекет заңмен тыйым салынатынын ескертіп, әлеуметтік желіде жарияланатын «әзілдердің» нақты салдары бар екенін атап өтті.