RUS
SMARTNEWS.KZ басылымының хабарлауынша, «Қайрат» футбол клубының бақылау кеңесінің төрағасы Қайрат Боранбаев Қазақстандағы футбол клубтарын жекешелендіру бастамасын қолдайтынын мәлімдеді. Оның айтуынша, бұл қадам отандық футболдағы бәсекені күшейтіп, саланың сапалы дамуына жол ашады.
Боранбаев жекешелендіруді футбол үшін оң үрдіс деп бағалайтынын атап өтті. Оның пікірінше, жеке меншікке өткен клубтар арасындағы ашық әрі әділ бәсеке мықты командалардың қалыптасуына ықпал етеді.
«Бұл — өте жақсы бастама. Біз салауатты бәсекені қолдаймыз. „Қайрат“ футбол клубы жекешелендіруді құптайды. Неге қарсы болуымыз керек? Күштісі жеңсін. Ең бастысы — осындай бәсекенің нәтижесінде сапалы футболшылар өсіп шығады. Бұл тек қазақстандық ойыншыларға ғана емес, шетелдік легионерлерге де қатысты. Ақыр соңында отандық футбол ұтады», — деді ол.
Айта кетейік, 2025 жылы бірқатар қазақстандық футбол клубтары жеке меншікке өтті. Олардың қатарында Қызылорданың «Қайсар», Петропавлдың «Қызылжар», Астананың «Жеңіс» және Қарағандының «Шахтер» клубтары бар. Ал «Ақтөбе» клубын жекешелендіру үдерісі аяқталуға жақын.