RUS
SMARTNEWS.KZ басылымының хабарлауынша, Шығыс Қазақстан облысындағы Риддер қаласында 23 желтоқсан күні күндізгі уақытта аула ішінде жол-көлік оқиғасы тіркелді. Оқиға қаланың төртінші шағынауданындағы көпқабатты тұрғын үйдің ауласында болған. Бұл туралы Noks.kz сайты жазды.
Алты жастағы бала подъезден жүгіріп шыққан сәтте оны өтіп бара жатқан автокөлік қағып кеткен. Соққыдан бала бірнеше метрге ұшып кеткенімен, өздігінен орнынан тұрған. Жүргізуші көліктен шығып, баламен сөйлескен. Алайда баланың жағдайын «қалыпты» деп бағалап, ешқандай көмек көрсетпестен оқиға орнынан кетіп қалған.
Куәгерлер дереу дабыл қағып, жол-көлік оқиғасы туралы ақпарат жергілікті чаттарда тарады. Үй ауласына орнатылған бейнебақылау камералары апат сәтін толық тіркеген. Көп ұзамай жол апатынан кейін қашып кеткен жүргізуші анықталып, полиция бөліміне жеткізілді.
Шығыс Қазақстан облысы полиция департаментінің мәліметінше, жол апатына Lada X-Ray маркалы автокөлік жүргізушісі себеп болған.
«23 желтоқсанда Риддер қаласында жүргізуші тұрғын үйлердің бірінің маңында кәмелетке толмаған жаяу жүргіншіні қағып кеткен. Жол-көлік оқиғасының салдарынан бала медициналық мекемеге жеткізілді. Жүргізуші анықталып, көлігі арнайы тұраққа қойылды. Қажетті сараптамалар тағайындалды, олардың нәтижесі бойынша процессуалдық шешім қабылданады», — деп хабарлады полиция.
Риддер қаласы әкімдігінің ақпаратынша, баланың жағдайы тұрақты.
«Бала ауруханаға жатқызылды. Кеуде тұсының соғылуы диагнозы қойылды. Дәрігерлер қажетті медициналық көмек көрсетті», — делінген хабарламада.