RUS
SMARTNEWS.KZ басылымының хабарлауынша, Парижде өткен 2024 жылғы Олимпиада ойындарының қола жүлдегері, қазақстандық боксшы Назым Қызайбай әлеуметтік желідегі парақшасында өз жолы туралы ой бөлісті. Спортшы өзін күмәнға алған пікірлер мен сенімсіздікке қарамастан, арманынан бас тартпағанын айтты.
32 жастағы боксшы Олимпиададан түскен суретін жариялап, жасы себепті көпшіліктің жеңіліс болжай бастағанын еске алды.
«Қанша жол, қанша сынақ артта қалғанын осы суретке қарап тағы бір рет сезіндім… Бұл сурет — жай ғана қола медаль емес. Бұл — сенімсіздікке, сөздерге, күмәнге берілмей өткен жолдың дәлелі», – деді ол.
Назым Қызайбайдың айтуынша, лицензиялық турнир қарсаңында «жасың өтті» деген сөздер жиі айтылған. Алайда оның бұл медальға жету жолындағы еңбегін көпшілік біле бермейді.
Спортшы желіде өзіне қарсы пікірлер де көп болғанын жасырмады. Кейбіреулер Олимпиада жолдамасын ала алмайтынын, ал алған күннің өзінде алғашқы жекпе-жекте жеңілетінін жазған.
«Көп адам сенбеді. Бірақ мен өзіме сендім. Айналадағы сөз маңызды емес. Жүрегіңді тыңда. Сені сынай ма, төмендетеді ме — өз жолыңнан тайма. Мен бәрін көріп жүрмін, бәрін білемін. Жай ғана өз ісімді істеп келемін. Алла маған мұның бәрін берді, себебі мен ешкімге жамандық тілемеймін. Маған жаман сөз айтқандарға да тек жақсылық тілеймін», – деді боксшы.
Еске салайық, Назым Қызайбай 2024 жылғы Олимпиадада қола жүлдеге ие болды. Жуырда спортшы осы жеңісі үшін сыйға берілген көлікті сатылымға қойғаны да хабарланған еді.