RUS
SMARTNEWS.KZ басылымының хабарлауынша, Ақтөбеде қалалық тұрғын үй қатынастары бөлімінің бұрынғы басшысы Жандос Әлімовке қатысты сот процесі басталды. Ол мемлекеттік тұрғын үй қорынан пәтерлерді бөлу кезінде қызметтік өкілетін асыра пайдаланды деп айыпталып отыр.
Жандос Әлімов — Шалқар ауданының тумасы. Ол 2021 жылдың қыркүйегінен 2024 жылдың қаңтарына дейін Ақтөбе қаласының тұрғын үй қатынастары бөлімін басқарған. Тергеу дерегінше, осы кезеңде ол оннан астам мемлекеттік пәтерді заңсыз жекешелендіруге ықпал еткен. Баспаналар бөлім қызметкерлеріне, өз жерлестеріне және жұбайының туған қарындасына берілген.
Айыптау тарапының мәліметінше, заңсыз әрекеттерге кедергі келтіруі мүмкін болғандықтан, Әлімов тұрғын үй комиссиясы құрамынан әкім аппаратының мемлекеттік-құқықтық бөлім басшысын шығарып, құжат айналымын бақылауда ұстайтын заңгерді процестен шеттеткен. Осыдан кейін комиссия мүшелерінің сеніміне кіріп, бастапқыда заңды шешімдер қабылдату арқылы олардың қырағылығын әлсіреткен.
Тергеу нұсқасына сәйкес, ол кезекте тұрған азаматтарға уақытша баспана беру тәжірибесін пайдаланған. Алайда бұл бөлмелер — жатақханаларда орналасқан, өмір сүруге қолайсыз орындар болған. Біраз уақыт өткен соң азаматтар қайта өтініш беріп, уақытша баспананы жайлы пәтерге ауыстыруды сұраған.
Нәтижесінде, айыптау тарапының болжамынша, аталған пәтерлер кейін заңсыз жекешелендіріліп, кейбірі сатылған немесе өзге адамдарға сыйға берілген.
Оқиғалардың бірінде Шалқар қаласының тұрғыны мемлекеттік тұрғын үй алу үшін жүгінген. Әлімов комиссия мүшелеріне өтініш иесінің баспана алуға құқығы бар деген түсінік қалыптастырып, оған Гришин көшесіндегі өмір сүруге жарамсыз жатақхана бөлмесін берген. Кейін ол бөлмені жайлы пәтерге ауыстырып, мемлекеттік тұрғын үйді өтеусіз жекешелендіріп алған. Араға бір ай салып, пәтерді 8,5 млн теңгеге сатқан.
Жандос Әлімов тағылған айыпты мойындамайды. Алғашқы сот отырысында оның қорғаушылары мен жұбайы бұлтартпау шарасын қамауда ұстаудан үйқамаққа немесе кепілге ауыстыруды сұрады. Олар Әлімовтің бес баласы барын, ең кенжесі 2025 жылы дүниеге келгенін алға тартты. Алайда сот бұл өтінішті қанағаттандырмады.
Сондай-ақ қорғау тарапы судьяға қарсылық білдіргенімен, ол да қабылданбады. Қазіргі уақытта сот процесі жалғасып жатыр. Тергеу нысанындағы пәтерлерге сот шешімі шыққанға дейін тыйым салынған.
Айта кетейік, тұрғын үй қатынастары бөлімінен кеткен соң Жандос Әлімов Ақтөбе облысының еңбек инспекциясы басқармасын да басқарған. Ол 30 қыркүйектен бері қамауда отыр.