RUS
SMARTNEWS.KZ басылымының хабарлауынша, Ресейдің Орынбор облыстық аудандық соты Орынбор әуежайында екі полиция қызметкеріне күш қолданды деген күдікпен Қазақстан азаматын екі айға қамауға алу жөнінде шешім шығарды.
Іс материалдарына сәйкес, 74 жастағы зейнеткер Ресейге Қазақстаннан қызын көру үшін барған. Шекараны автокөлікпен кесіп өткеннен кейін ол сапарын әуе рейсімен жалғастырмақ болған.
Алайда әуежайдағы тексеру кезінде әйел қол жүгінде бес литрлік ыдысқа құйылған май алып өтпек болған. Мұндай затты ұшақ салонына кіргізуге әуе тасымалы ережелері қатаң тыйым салады. Полиция қызметкерлерінің ескертуі зейнеткердің ашулы реакциясын тудырып, соңы жанжалға ұласқан. Нәтижесінде екі құқық қорғау қызметкері зардап шеккен.
Сот отырысында әйел өз кінәсін мойындамай, ешқандай заң бұзушылық жасамағанын мәлімдеді.
Күдіктінің жасы ескеріліп, бастапқыда бұлтартпау шарасын таңдау мәселесі кейінге қалдырылған. Сот туыстарына кепіл немесе үйқамақ ұйымдастыруға мүмкіндік берген. Алайда уақытша ұстау изоляторынан алынған мінездемелерде зейнеткердің белгіленген тәртіпті сақтауға ниет білдірмейтіні көрсетілген. Сонымен қатар сот оның Ресей аумағынан кетуді жоспарлағаны жөніндегі ақпаратты да назарға алған.
Осы жайттардың барлығын ескере отырып, сот күдіктіні екі ай мерзімге қамауға алу туралы шешім қабылдады.