RUS
SMARTNEWS.KZ басылымының хабарлауынша, тергеу органдары блогерлер Эльмира және Ерболат Жанабыловтарды қылмыстық іс аясында күдікті деп таныды. Алайда ерлі-зайыптылардың қорғаушысы бұл шешімнің заңдылығына күмән келтіріп отыр. Бұл туралы адвокат Жасұлан Рахымғалиев мәлімдеді.
Оның айтуынша, Экономикалық тергеп-тексеру департаменті Жанабыловтарды күдікті деп тану жөнінде екі қаулы шығарған. Бұған дейін қорғау тарапы бірқатар өтінішхат жолдап, олардың бір бөлігі қанағаттандырылған. Алайда соңғы өтініш — сараптама тағайындау туралы талап — ешқандай нақты негізсіз кері қайтарылған.
Осыған байланысты қорғау тарапы құқықтық күрестің белсенді кезеңіне көшкен.
«Өтінішхат қанағаттандырылмаған соң, біз тергеу органдарының әрекетіне жоғары қадағалау органдарына, соның ішінде прокуратураға шағым түсірдік. Қазіргі таңда Қылмыстық-процестік кодекстің 106-бабына сәйкес бірнеше шағым берілді. Сонымен қатар тергеу судьясы арқылы соттық бақылау орнатылды. Әрбір тергеу әрекетінің заңдылығын тексереміз», – деді адвокат.
Қорғау тарапы айыптаудың негізіне алынған дәлелдерге де ерекше назар аударып отыр. Жасұлан Рахымғалиевтің сөзінше, күдікті деп тану туралы қаулыларда негізгі дәлел ретінде Құмар ойындар мен лотереяны реттеу комитетінің қорытындысы көрсетілген.
«Бұл комитет әкімшілік іс барысында хаттама жасаған және айыптауды қолдаған тарап болды. Енді сол органның қорытындысын тәуелсіз сарапшы пікірі ретінде пайдалану – заңға қайшы. Бұл мүдделі тарап, оның тұжырымы объективті дәлел бола алмайды», – деді ол.
Адвокат тергеу органдарының әрекеттері толық әрі әділ тексерілуі тиіс екенін атап өтті. Қорғау тарапы заң аясында берілген барлық шағым объективті қаралады деп үміттенеді.
Блогерлер істің қалай өрбитінін қоғамға ашық түрде жеткізіп отыруды жоспарлап отыр.
Еске салсақ, 15 қыркүйекте Астананың мамандандырылған ауданаралық соты Ерболат Жанабылов пен Эльмира Төлегеноваға қатысты әкімшілік істі қараған. Олар лицензиясыз лотерея ұйымдастырды деп айыпталған. Іске азаматтардың шағымдары мен Қаржылық мониторинг агенттігінің жолдаған хаты негіз болған.
Тергеу дерегінше, блогерлер Instagram желісінде күн сайын ақша, автокөлік және өзге де сыйлықтар тігілген ұтыс ойындарын өткізген. Кейін сот шешімінен соң материалдар қаржылық операцияларды тексеру үшін Қаржылық мониторинг агенттігіне жолданған.