RUS
SMARTNEWS.KZ басылымының хабарлауынша, Қазақстанда шалғай елді мекендерді интернетпен қамту үшін спутниктік байланыс саласында екі жаңа шетелдік оператор іске қосылмақ. Бұл туралы 6 қаңтарда Үкімет отырысында Премьер-министрдің орынбасары – жасанды интеллект және цифрлық даму министрі Жаслан Мәдиев мәлімдеді.
Министрдің айтуынша, бүгінде ел аумағында спутниктік интернет қызметін көрсететін үш оператор жұмыс істеп тұр. Алдағы уақытта олардың қатары тағы екі компаниямен толығады.
«Бұл операторлар бойынша пилоттық сынақтарды биыл өткізу жоспарланып отыр», – деді Жаслан Мәдиев.
Сонымен қатар 2026 жылы спутниктік интернет жекелеген пойыздар мен әуе кемелерінде қолжетімді бола бастайды. Бұл жолаушылар үшін байланыссыз аймақтарда да тұрақты интернетке қол жеткізуге мүмкіндік береді.
Министр шалғай және туристік аймақтарда байланыс мәселесін шешу жергілікті атқарушы органдардың міндеті екенін атап өтті.
«Байланыс мүлде жоқ жерлерде әкімдіктер туристік және қолжетімсіз аумақтарды жергілікті бюджет есебінен спутниктік интернетпен қамтамасыз етуі тиіс», – деді ол.
Билік бұл қадам елдегі цифрлық теңсіздікті азайтып, инфрақұрылымы әлсіз өңірлердің дамуына серпін береді деп отыр.