RUS
SMARTNEWS.KZ басылымының хабарлауынша, Шымкентте аса ірі көлемдегі алаяқтық дерегі бойынша халықаралық іздеуде жүрген әйел ұсталды. Бұл туралы Polisia.kz жазды.
Полицияның жедел-іздестіру шаралары нәтижесінде бірнеше эпизодқа қатысы бар күдікті анықталып, уақытша ұстау изоляторына қамалды. Тергеу мәліметінше, әйел Шымкент қаласының тұрғындарын алдау арқылы 80 млн теңгеден астам материалдық шығын келтірген.
Алаяқтық әрекеттердің бірі – алтын бұйымдар сатумен айналысатын кәсіпкердің сеніміне кіріп, қымбат әшекейлерді иемдену. Күдікті таныстығын пайдаланып, зергерлік бұйымдарды алып, өз міндеттемелерін орындамаған.
Сонымен қатар, әйел шетелге арзан туристік жолдамалар ұйымдастырамын деп азаматтардан алдын ала төлем алған. Алайда уәде етілген сапарлар жүзеге аспаған, ал жәбірленушілердің ақшасы қайтарылмаған.
Аталған фактілер бойынша күдікті халықаралық іздеуге жарияланған. Қазір тергеу амалдары жалғасып жатыр, қылмыстық әрекеттің өзге де эпизодтарын анықтау жұмыстары жүргізілуде.