RUS
SMARTNEWS.KZ басылымының хабарлауынша, «Қайрат» футбол клубы ресми Instagram парақшасында израильдік футболшы Офри Арадтың клубтан кеткенін хабарлады.
27 жастағы ойыншымен жасалған келісімшарт мерзімі аяқталған соң, ол клубтан кеткен. Қазір Арадтың қайда ойнайтыны туралы ресми ақпарат жоқ. Оның трансферлік құны 1,2 млн еуро деп бағаланып отыр.
Офри 2023 жылы «Қайратқа» қосылып, бастапқыда орталық қорғаушы ретінде ойнаған. Келесі маусымда оны қорғанысты ортадағы жартылай қорғаушы позициясына ауыстырып, команданың негізгі құрамына айналған. Арад клубқа 2024 және 2025 жылдары чемпион атануға, 2025 жылы Қазақстан Суперкубогын жеңіп алуға және Чемпиондар лигасының жалпы кезеңіне шығуға көмектесті.
Офри Арадтың соңғы матчы қараша айында өтті. Ол Италияның «Интер» командасына қарсы гол соққанымен, «Қайрат» 1:2 есебімен ұтылды. Кейін ойыншы жарақатынан айықты. Жалпы, Арад алматылық команда сапында 92 матчқа қатысып, 3 гол соқты және 10 голға пас берді. Сонымен қатар, ұлттық құрамамен 10 ойын өткізген.
«Қайрат» футбол клубы Офриге жоғары кәсібилігі, жанкешті еңбегі және команданың жетістіктеріне қосқан үлесі үшін алғыс айтып, болашақтағы табыстарын тілейді», – делінген клубтың мәлімдемесінде.