RUS
SMARTNEWS.KZ басылымының хабарлауынша, Қарағанды облысында қарамағындағы қызметкерін зорлауға оқталды деген айыппен сот алдында жауап беріп жатқан ауылдың бұрынғы әкіміне қатысты іс қоғамда қызу талқыға түсті. Прокурор айыптау бабын жеңілдетуді ұсынып, бұл шешім жәбірленуші тараптың наразылығын тудырды. Оқиға туралы Информбюро бағдарламасы жеткізді.
Сот отырысында мемлекеттік айыптаушы экс-әкімге тағылған «зорлауға оқталу» бабын «денсаулыққа қасақана жеңіл зиян келтіру» ретінде қайта саралауды сұраған. Бұл ұсынысқа 23 жастағы жәбірленуші қыздың туыстары үзілді-кесілді қарсы.
Жәбірленуші тараптың айтуынша, Ақшатау ауылының бұрынғы әкімі қарамағында істеген бас маманмен қызметтік үйде бірге тұрған. Сол кезеңде ол жас әйелді зорламақ болып, қарсылық көрсеткені үшін соққыға жыққан.
Істі одан әрі ушықтырған жайт – күдіктінің жәбірленушінің әкесімен бала кезден жақын араласқан, жан жолдас болғаны. Алайда 48 жастағы Нұрлан Сейілбеков өзіне тағылған айыпты мойындамай отыр.
Жәбірленушінің әкесі Асыл Рақымжановтың айтуынша, қызы оқиғадан кейін ауыр психологиялық күйзеліске түсіп, денсаулығына зиян келген. Ол прокурордың айыпты жеңілдету әрекетін әділетсіз деп бағалап, істі қайта қарауды талап етуде.
«Жан жолдасым болған соң сеніп, қызымды жұмысқа орналастыруға келісім бердім. Қызымды бірге тұрамыз деп алып кетті. Кейін зорламақ болған. Ұрып-соғып, басын пешке тығып, шашынан сүйреп, зорлық көрсетуге әрекет жасаған», – деді жәбірленушінің әкесі Асыл Рақымжанов.
Аталған іс бойынша сот процесі жалғасып жатыр. Жәбірленуші тарап әділ шешім қабылдануы тиіс екенін айтып, айыптың ауырлығына сай бап қолдануды талап етуде.