RUS
SMARTNEWS.KZ басылымының хабарлауынша, Атырау облысының полициясы Жангелдин ауылында жоғалған отбасы туралы әлеуметтік желілерде жарияланымдар таратқан «Хакер» лақап атымен танылған азаматты іздестіріп жатыр. Бұл туралы АқЖайық басылымы жазды.
Полиция мәліметінше, ер адамның шын аты — Нұрлан. Ол отбасының жоғалғаны туралы ақпарат жария болғаннан кейін әлеуметтік желілерде белсенділік танытып, жоғалған адамдардың орналасқан жері жөнінде дерегі барын мәлімдеген. Өз жазбаларында ол бұл ақпаратты SIM-карталарды және қаржылық қозғалыстарды «талдау арқылы» алғанын айтқан.
Кейінірек аталған азамат өзіне құқық қорғау органдары тарапынан қысым көрсетіліп жатқанын да жариялаған.
Алайда Атырау облыстық полиция департаменті бұл мәлімдемелерді жоққа шығарды. Ведомствоның ресми хабарлауынша, жоғалған отбасының орналасуына қатысты барлық деректер ішкі істер органдарының заңды жедел-іздестіру және тергеу шаралары аясында, әлеуметтік желілердегі кез келген жазбалар пайда болмай тұрып анықталған.
«Аталған тұлға жаңа мәлімет алған жоқ және ешқандай дербес техникалық талдау жүргізбеген. Ол таратқан ақпарат ресми ресми іздеу хабарламасымен толық сәйкес келеді және ол мәліметтер ресми деректер дайын болғаннан кейін алынған», — деп мәлімдеді полиция.
Құқық қорғау органдары бұл ақпараттың профильді техникалық мамандардың қатысуымен, байланыс операторлары және өзге де уәкілетті ұйымдармен бірлесіп, заң талаптарына сай алынғанын атап өтті.
Сондай-ақ полиция «қысым көрсетілді» деген ақпараттың шындыққа жанаспайтынын мәлімдеп, азаматтарды тек ресми дереккөздерге сүйенуге шақырды. Жалған ақпарат таратқаны үшін қылмыстық жауапкершілік қарастырылғаны да ескертілді.
Белгілі болғандай, бұған дейін «Хакер» лақап атымен танылған азаматқа қатысты алаяқтық деректері бойынша төрт қылмыстық іс тіркелген. Қазіргі уақытта бұл істер бойынша тергеу жалғасып жатыр, ал күдікті заң талаптарына сәйкес іздеуге жарияланған.