RUS
49 жастағы Нағима жалдамалы пәтерде тұрады. Оның жұбайы туғаннан бері естімейді әрі сөйлей алмайды, үшінші топтағы мүгедек. Ал екі баласы эпилепсия дертіне шалдыққан, ұстамалары құрысуымен өтеді.
«Екі баламда да эпилепсия бар, жиі ұстама болады. Жолдасым да мүгедек, туғаннан бері естімейді, сөйлей алмайды», – дейді Нағима.
Өзі де қант диабетімен ауырады. Күнкөріс үшін түрлі іс-шараларда ыдыс жуып, мешіт маңындағы жәрмеңкелерде үйде дайындаған тағамдарын сатып күнелтеді.
«Ең ауыр сәт – екі баламды бірдей құрысу ұстамасымен ауруханаға алып кеткен кез болды. Сол уақытта күйеуім де отаға түсті. Сол күндері мен үшін отбасыммен бірге отырып, жай ғана тамақ ішіп, шай ішу арманға айналды», – деп еске алады ол.
Бетперде киген адам Нағиманың жағдайын тыңдап, оған ақша салынған конверт табыстады. Айтуынша, бұл қаражат отбасының ем-дом алуына және жеке кәсібін бастауына мүмкіндік береді. Бұған қоса, отбасыға өз баспанасының кілті де берілді.
Күтпеген қуаныштан Нағима көз жасына ерік берді. Оның қуанышына отбасының басқа мүшелері де ортақтасты.
Мұндай игі істер қиын кезеңде үміт сыйлап, адамдардың өмірін түбегейлі өзгерте алатынын тағы бір мәрте көрсетті.