Бокс федерациясы Әлімханұлының допинг ісіне қатысты қатаң мәлімдеме жасады

SMARTNEWS.KZ басылымының хабарлауынша, 8 қаңтарда қазақстандық боксшы Жәнібек Әлімханұлының ісі бойынша допинг-сынама В-ның ашылу рәсімі өтті. Осыған байланысты Қазақстанның кәсіпқой бокс федерациясы ресми түсініктеме берді.

Федерация бұл кезеңнің құқықтық тұрғыдан аса маңызды екенін атап өтті. Аталған рәсім спортшының мансабына ғана емес, іске қатысы бар барлық тараптың әрекетіне берілетін заңдық бағаға да тікелей әсер етеді. Мәлімдемеде халықаралық спорт құқығының негізгі қағидаттары — кінәсіздік презумпциясы, рәсімдік адалдық және регламенттерді қатаң сақтау басшылыққа алынатыны көрсетілген.

«В-сынама бойынша ресми әрі тиісті түрде рәсімделген қорытынды шыққанға дейін спортшы заң жүзінде кінәсіз деп есептеледі. Ал оған қатысты айыптаушы сипаттағы кез келген жария мәлімдемені біз процеске қысым жасау және оның құқықтарын бұзу деп бағалаймыз», – делінген Федерация мәлімдемесінде.

Федерация мына талаптарды алға тартты:

– В-сынама тек бекітілген рәсімдерге сай ашылып, талдануы тиіс;
– спортшы мен оның өкілдері процеске, құжаттамаға және нәтижелерге толық қол жеткізуге құқылы;
– регламенттен кез келген ауытқу құқықтық бағалауға жатады және нәтижелерді жарамсыз деп тануға негіз болуы мүмкін.

Сондай-ақ ұйым Жәнібек Әлімханұлын тіркелген кәсіпқой боксшы ретінде толық юрисдикциялық қорғауда ұстайтынын мәлімдеді.

«Қазақстанның кәсіпқой бокс федерациясы спортшының заңды құқықтары мен іскерлік беделін қорғау үшін халықаралық құқық пен спорттық регламенттерде көзделген барлық тетіктерді қолданады», – деп атап өтті ведомство.

Егер В-сынама таза болып шықса, Федерация барлық айыптауларды ресми түрде алып тастауды, спортшының беделін жария түрде қалпына келтіруді және істің барысында кеткен әрекеттерге талдау жүргізуді талап етпек. Ал ережебұзушылықтар анықталған жағдайда шешімдер қос стандартсыз, тек қолданыстағы регламент аясында қабылданады.

Айта кетейік, Әлімханұлының допинг-тесті оң нәтиже көрсеткені туралы ақпарат оның АҚШ-та 7 желтоқсанға жоспарланған Эрисланди Ларамен үш чемпиондық белбеу үшін өтетін біріктіруші жекпе-жегінің өтпей қалуына себеп болды. VADA тестілеуінен кейін боксшыда тыйым салынған затқа қатысты «adverse analytical finding» тіркелген.

Туризм және спорт министрлігінің мәліметінше, спортшының командасы түсіндірмелер әзірлеп, істің толық әрі әділ қаралуын талап етпек. Мақсат — Жәнібек Әлімханұлының кінәсіз екенін дәлелдеу немесе тыйым салынған заттың пайда болу мән-жайын анықтау.

IBF рейтингінің жаңартылған нұсқасында Әлімханұлының мәртебесі өзгермеген — ол әлі де чемпион ретінде көрсетілген. В-сынама қорытындысы күтілуде.

АҚШ-та қазақстандық чемпионға қатысты допинг дауы жіті бақылауда. Ал беделді The Ring журналы Әлімханұлын өз рейтингінен алып тастағанын хабарлады.

WBO және IBF нұсқалары бойынша орта салмақтағы әлем чемпионы чемпиондық белбеулерінен айырылуы мүмкін деген болжам айтылуда. Дегенмен Қазақстанның спорт министрі түпкілікті қорытынды жасауға әлі ерте екенін мәлімдеді.