Трамп Венесуэланың уақытша президентімен алғаш рет тілдесті
АҚШ пен Венесуэла арасында жаңа диалог басталды.
SMARTNEWS.KZ басылымының хабарлауынша, Венесуэланың уақытша президенті Делси Родригес АҚШ президенті Дональд Трамппен телефон арқылы сөйлескенін мәлімдеді.
Делси Родригестің айтуынша, әңгіме ұзақ, мазмұнды және өзара сыйластық жағдайында өткен. Тараптар екі ел арасындағы ынтымақтастықтың күн тәртібін, сондай-ақ үкіметтер арасындағы шешілмеген мәселелерді талқылаған.
«Бүгін мен АҚШ президенті Дональд Трамппен ұзақ, нәтижелі әрі сыпайы телефон әңгіме өткіздім. Кездесу өзара құрметке негізделді. Біз халықтарымыздың игілігі үшін екіжақты жұмыс бағыттарын және мемлекеттер арасындағы шешілмеген түйткілдерді қарастырдық», — деп жазды Родригес.
Дональд Трамп телефон арқылы сөйлескенін растады. АҚШ президенті Венесуэламен қарым-қатынасты «өте жақсы» деп бағалаған.
Сонымен қатар Дональд Трамп Truth Social әлеуметтік желісіндегі парақшасында өзін Венесуэланың міндетін атқарушы президенті ретінде көрсететін бейнежазба жариялады.
Бұдан бөлек, АҚШ президенті НАТО төңірегіндегі жағдайға да тоқталды. Гренландияға қатысты Вашингтонның талаптарынан туындаған шиеленіс аясында Трамп альянсты «дәл өзі сақтап қалғанын» мәлімдеді.
Материал авторы
