RUS
SMARTNEWS.KZ басылымының хабарлауынша, Алматы облысында ер адамның әйеліне қатысты дөрекі әрекеттері түсірілген видео полицияның назарын аудартты. Әлеуметтік желіде тараған бейнежазбада атқа мінген ер адам әйелін жұлқып, балағат сөздер айтып, қорқытып тұрғаны көрінеді. Оқиғаға байланысты тексеру басталды.
Белгілі болғандай, видеоны ер адамның өзі емес, жұбайы жасырын түрде түсіріп алған. Ерлі-зайыптының бес баласы бар. Әйел бейнежазба арқылы күйеуінің өзіне ғана емес, балаларына да дөрекі сөйлеп, жиі балағаттайтынын көрсеткісі келген.
Кадрлардан масаң күйде жүрген ер адамның қызына да ауыр сөздер айтып жатқан сәттері байқалады. Видео қоғамда резонанс тудырып, құқық қорғау органдарының назарына ілікті.
Алматы облысы полиция департаменті Instagram әлеуметтік желісін мониторингтеу барысында аталған жазбаны анықтағанын хабарлады. Алдын ала дерек бойынша, оқиға Алматы облысы Архарлы ауылында болған. Күдікті — 49 жастағы жергілікті тұрғын.
«Материал тіркелді, отбасында болуы мүмкін зорлық-зомбылық фактісі бойынша тексеру жүргізіліп жатыр. Нәтижесіне қарай қолданыстағы заңнама аясында процессуалдық шешім қабылданады», — деп мәлімдеді полиция өкілдері.
Құқық қорғау органдары осыған дейін аталған дерек бойынша ресми арыз түспегенін атап өтті. Тексеру жалғасып жатыр.