RUS
SMARTNEWS.KZ басылымының хабарлауынша, Павлодар облысы Ертіс ауылындағы жеке тұрғын үйде өрт шықты. Үйде төрт бала болған. Бұл туралы Төтенше жағдайлар департаменті жеткізді.
Төтенше жағдайлар қызметіне хабар 8:33-та түскен. Өрт сөндірушілер келген кезде үй толықтай отқа оранған, жиһаз, тұрмыстық заттар мен шатыр жанып жатқан. Қатты түтінге қарамастан, өрт сөндірушілер дереу балаларды іздеуге кіріскен.
Өрт сөндірушілер үш баланы аман алып, жедел жәрдемге тапсырды. Тағы бір бала өрт сөндірушілер келмей тұрып құтқарылған.
Осы оқиғадан кейін екі бала ауруханада көз жұмды, қалған екі бала ем алуды жалғастыруда. Зардап шеккендерге күйік және улы газдан улану диагнозы қойылған.
Қазіргі уақытта өрттің шығу себептері зерттеліп жатыр.